ಅರಳಿ ಕಟ್ಟೆ

ಅರಳಿ ಕಟ್ಟೆ: ಸಮಾಜಶಾಸ್ತ್ರೀಯ ದೃಷ್ಟಿಕೋಣ

ಅರಳಿ ಕಟ್ಟೆ

ಆಗಸ್ಟ್ ಕಾಮ್ಟ್ ಅವರ ಪ್ರಕಾರ ಸಮಾಜಶಾಸ್ತ್ರವು ಉಗಮಗೊಳ್ಳುತ್ತಿದ್ದಂತಹ ವಿಜ್ಞಾನ. ಆತನ ಪ್ರಕಾರ ಸಮಾಜಶಾಸ್ತ್ರದ ಭವಿಷ್ಯವು ಭೌತಶಾಸ್ತ್ರದ ಪ್ರತ್ಯಕ್ಷ ಪ್ರಮಾಣ ವಾದವನ್ನು ಅನುಸರಿಸಿತ್ತು. ಡರ್ಖೀಂ, ಮಾರ್ಕ್ಸ್ ಮುಂತಾದ ಸಮಾಜಶಾಸ್ತ್ರದ ಪ್ರವರ್ತಕರೂ ಕೂಡ ಸಮಾಜಶಾಸ್ತ್ರವನ್ನು ವೈಜ್ಞಾನಿಕ ಅಧ್ಯಯನದ ಭಾಗವಾಗಿ ಪರಿಗಣಿಸಿದ್ದರು. ಆದರೆ, ಮಾನವರ ಜೀವನವನ್ನು ವೈಜ್ಞಾನಿಕವಾಗಿ ಹೇಗೆ ಅಧ್ಯಯನ ಮಾಡಬಹುದು? ಈ ಅಂಶವನ್ನು ತಿಳಿಯಬೇಕೆಂದರೆ, ಮೊದಲು, ನಾವು ವಿಜ್ಞಾನವೆಂದರೇನು ಎಂಬುದನ್ನು ತಿಳಿಯಬೇಕು.

ಆಂಥೋಣಿ ಗಿಡ್ಡೆನ್ಸ್ ಅವರ ಪ್ರಕಾರ, ವಿಜ್ಞಾನವೆಂದರೆ, ಅನುಭವಜನ್ಯ ಪರೀಕ್ಷೆಗಳನ್ನು ನಡೆಸಲು ವ್ಯವಸ್ಥಿತ ವಿಧಾನವನ್ನು ಬಳಸುವುದು, ದತ್ತಾಂಶಗಳ ವಿಶ್ಲೇಷಣೆ, ಸೈದ್ಧಾಂತಿಕ ಚಿಂತನೆ ಮತ್ತು ನಿರ್ದಿಷ್ಟ ವಿಷಯದ ಬಗ್ಗೆ ಜ್ಞಾನವನ್ನು ಬೆಳೆಸಲು ತರ್ಕಬದ್ಧವಾದ ಮೌಲ್ಯಮಾಪನಗಳನ್ನು ಮಾಡಬಹುದಾಗಿದೆ. ಈ ವ್ಯಾಖ್ಯೆಯ ಪ್ರಕಾರ ಸಮಾಜಶಾಸ್ತ್ರ ಒಂದು ವಿಜ್ಞಾನ. ಸಮಾಜಶಾಸ್ತ್ರದಲ್ಲಿಯೂ ಕೂಡ ನಾವು ಅನುಭವಜನ್ಯ ಸಂಶೋಧನೆಗಾಗಿ ವ್ಯವಸ್ಥಿತ ಸಂಶೋಧನ ವಿಧಾನಗಳನ್ನು ಬಳಸುವುದನ್ನು, ದತ್ತಾಂಶಗಳ ವಿಶ್ಲೇಷಣೆಯನ್ನು, ಮತ್ತು ಲಭ್ಯವಿರುವ ಮಾಹಿತಿ ಹಾಗು ತಾರ್ಕಿಕ ವಾದಗಳ ಆಧಾರದಲ್ಲಿ ಸಿದ್ಧಾಂತಗಳನ್ನು ಪರಿಶೀಲಿಸುವುದನ್ನು ನಾವು ಕಾಣಬಹುದು. ಸಮಾಜಶಾಸ್ತ್ರಜ್ಞರು, ತಮ್ಮ ಸಂಶೋಧನೆಗಳಲ್ಲಿ ಅನುಭವಕ್ಕೆ ನಿಲುಕುವಂತಹ ಹಾಗೂ ವಾಸ್ತವಿಕವಾದ ಪ್ರಶ್ನೆಗಳನ್ನು ಕೇಳುತ್ತಾರೆ. ಆದರೆ, ಸಮಾಜದ ಬಗೆಗಿನ ವಾಸ್ತವಿಕ ಪ್ರಶ್ನೆಗಳು ಮತ್ತು ದತ್ತಾಂಶಗಳನ್ನು ಕೋಷ್ಟಕ (ಟೇಬಲ್)ಗಳು ಅಥವಾ ಗ್ರಾಫ಼್ಗಳ ಮೂಲಕ ಪ್ರಸ್ತುತಪಡಿಸುವುದರಿಂದ ನಮ್ಮ ಜ್ಞಾನ ಹೆಚ್ಚೇನು ಹೆಚ್ಚುವುದಿಲ್ಲ. ಅವರು ಇದರ ಜೊತೆಗೆ ತುಲನಾತ್ಮಕ ಪ್ರಶ್ನೆಗಳನ್ನು, ಅಭಿವೃದ್ಧಿ ಸಂಬಂಧಿತ ಪ್ರಶ್ನೆಗಳನ್ನು ಮತ್ತು ಸೈದ್ಧಾಂತಿಕ ಪ್ರಶ್ನೆಗಳನ್ನೂ ಕೇಳುವರು. ಈ ಪ್ರಶ್ನೆಗಳಿಗೆ, ಆಂಥೋಣಿ ಗಿಡ್ಡೆನ್ಸ್ ಅವರ ಚಿಂತನೆಯನ್ನಾಧರಿಸಿ, ನಾವು ಭಾರತದ ಎಲ್ಲಾ ಗ್ರಾಮ ಮತ್ತು ನಗರಗಳಲ್ಲಿ ಕಂಡುಬರುವಂತಹ ಅರಳಿ ಮರದ ಉದಾಹರಣೆಯನ್ನು ತೆಗೆದುಕೊಂಡು ವಿವರಿಸಬಹುದು.

ಸಸ್ಯಶಾಸ್ತ್ರಜ್ಞರು ಅರಳಿ ಮರವನ್ನು ಫೈಕಸ್ ರಿಲಿಜಿಯೋಸ ಎಂದು ಕರೆಯುವರು ಮತ್ತು ಇದೊಂದು ಅರೆ-ನಿತ್ಯಹರಿದ್ವರ್ಣ ಮರ. ಹಾಗೆಯೇ ಆಕೆಯು ಎತ್ತರ, ಗಾತ್ರ, ಎಲೆಗಳ ಆಕಾರ, ಯಾವ ರೀತಿಯ ಮರವನ್ನು ಅದು ನೀಡುವುದು, ಅದು ಕೊಡುವಂತಹ ಹಣ್ಣು ಮುಂತಾದ ವಿಷಯಗಳ ಬಗ್ಗೆ ಕೂಡ ಆಸಕ್ತಳಾಗಿರಬಹುದು.

ಓರ್ವ ಪರಿಸರಶಾಸ್ತ್ರಜ್ಞೆಗೆ ಅರಳಿ ಮರವು ನಿರಂತರವಾದ ಆಮ್ಲಜನಕದ ಮೂಲ; ಓರ್ವ ವರ್ಣಚಿತ್ರಕಾರನು ಅದನ್ನು ಸೂರ್ಯೋದಯದ ಸಮಯದಲ್ಲಿ ವೀಕ್ಷಿಸಿದರೆ, ಬೆಳಕು ಯಾವ ದಿಶೆಯಿಂದ, ಯಾವ ಕೋನದಿಂದ ಅದರ ಮೇಲೆ ಬೀಳುವುದು. ಹೀಗೆ ಚೆಲ್ಲಿದ ಬೆಳಕಿನಿಂದಾಗಿ ಯಾವ ರೂಪದ ನೆರಳು ಉಂಟಾಗುವುದು ಮತ್ತು ಹಸಿರು ಬಣ್ಣದ ಯಾವ ಯಾವ ಛಾಯೆಗಳು ಮೂಡುವುದು ಎಂಬುದರ ಬಗ್ಗೆ ಆಸಕ್ತವಾಗಿರಬಹುದು.

ಆಯುರ್ವೇದ ವೈದ್ಯರಿಗೆ ಅರಳಿ ಮರವು ಒಂದು ಔಷಧೀಯ ಸಸ್ಯ, ಅಸ್ತಮಾ, ಮಧುಮೇಹ, ಅತಿಸಾರ, ಅಪಸ್ಮಾರ, ಪಿತ್ಧ ಸಂಬಂಧ, ಊತ, ಸೋಂಕು, ಲೈಂಗಿಕ ಸಮಸ್ಯೆಗಳು ಮುಂತಾದ ಸರಿಸುಮಾರು ೫೦ ಆರೋಗ್ಯ ಸಮಸ್ಯೆಗಳ ಗುಣಪಡಿಸುವಿಕೆಯಲ್ಲಿ ಬಳಸುವರು.

ಈ ರೀತಿಯ ನೋಡುವಿಕೆಗಿಂತ ಭಿನ್ನವಾಗಿ, ಹಿಂದುಗಳು ಮತ್ತು ಬೌದ್ಧರು ಅದನ್ನು ಪವಿತ್ರತೆಯ ಸಂಕೇತವೆಂದು ಪರಿಗಣಿಸುವರು. ಅರಳಿ ಮರವು ಜ್ಞಾನ, ನಿರಂತರತೆ, ದೃಢತೆಯನ್ನು ಸೂಚಿಸುವುದು. ಈ ಮರವನ್ನು ಪವಿತ್ರ ಅಂಜೂರ ಎಂದೂ ಕರೆಯಲಾಗುತ್ತದೆ.

ಅರಳಿ ಮರ: ಸಮಾಜಶಾಸ್ತ್ರಜ್ಞರಿಗೆ ಸಾಂಸ್ಕೃತಿಕ ಸಂಕೇತ

ಹಾಗಾದರೆ, ಸಮಾಜಶಾಸ್ತ್ರಜ್ಞರು ಅರಳಿ ಮರವನ್ನು ಹೇಗೆ ಅರ್ಥ ಮಾಡಿಕೊಳ್ಳುವರು?

ನೇಪಾಳದ ಲುಂಬಿನಿಯಲ್ಲಿ ಬೌದ್ಧ ಭಿಕ್ಷುವೊಬ್ಬರು ಅರಳಿ ಮರ (ಬೋಧಿ ವೃಕ್ಷ)ದ ಕೆಳಗೆ ಧ್ಯಾನ ಮಾಡುತ್ತಿರುವುದು

ಮೂಲತಃ ಸಮಾಜಶಾಸ್ತ್ರಜ್ಞನಿಗೆ ಅರಳಿ ಮರವು ಒಂದು ಸಾಂಸ್ಕೃತಿಕ ಸಂಕೇತ. ಹಿಂದುಗಳು ಮತ್ತು ಬೌದ್ಧರು ದೈನಂದಿನ ಜೀವನವನ್ನು ಪ್ರಭಾವಿಸುಂತಹ ಐತಿಹ್ಯಗಳು ಅದರ ಸುತ್ತ ಹೆಣೆದುಕೊಂಡಿರುವುದು. ಮಾನವರು ಪ್ರಕೃತಿಯೊಡನೆ ಹೇಗೆ ಸಂಬಂಧ ಕಲ್ಪಿಸಿಕೊಳ್ಳುತ್ತಾರೆಂಬುದನ್ನು ಇದು ತೋರಿಸಿಕೊಡುವುದು; ಹಾಗೆಯೇ, ಜನರು ಆಟವಾಡಲು, ಚರ್ಚಿಸಲು, ಪೂಜಿಸಲು, ನಿರ್ಣಯ – ನಿರ್ಧಾರಗಳಿಗೆ ಬರಲು ಅದರ ಬಳಿ ಸೇರುವರು. ಹಾಗಾಗಿ, ಹಳ್ಳಿಯ ಜನರು ನಡುವಿನ ಸಾಮಾಜಿಕ ಅಂತಃಕ್ರಿಯೆಯು ಯಾವ ವಿಧದಲ್ಲಿ ನಡೆಯವುದೆಂದು ಅರಿಯಲು ಅರಳಿ ಮರವು ಸಮಾಜಶಾಸ್ತ್ರಜ್ಞರಿಗೆ ಒಂದು ವೇದಿಕೆ ಆಗಿದೆ. ನಮಗೆ ತಿಳಿದಿರುವಂತೆ, ಸಾಮಾನ್ಯವಾಗಿ ಅರಳಿ ಮರವು ಒಂದು ಕಟ್ಟೆಯನ್ನು (ಅರಳಿ ಕಟ್ಟೆ) ಹೊಂದಿರುತ್ತದೆ.

ನಾವು ಮೇಲೆ ನೋಡಿದಂತಹ ಚಟುವಟಿಕೆಗಳು ಈ ಕಟ್ಟೆಯ ಮೇಲೆ/ ಸುತ್ತಲೇ ನಡೆಯುವಂತಹುದು. ಆದರೆ ಇವು ಕೇವಲ ಚಟುವಟಿಕೆಗಳಲ್ಲ; ಅವು ಸಾಮಾಜಿಕ ಕ್ರಿಯೆಗಳು. ಏಕೆಂದರೆ, ಈ ಮೇಲಿನ ರೀತಿಯ ಚಟುವಟಿಕೆಗಳು ಸಾಮಾಜಿಕ ಮೌಲ್ಯಗಳ ರಚನೆಯಲ್ಲಿ ಉಂಟಾಗುವುದು. ಆದ್ದರಿಂದ, ಮಹಿಳೆಯರು ಬೆಳಗಿನ ಜಾವದಲ್ಲಿ ಏಕೆ ಅರಳಿ ಮರವನ್ನು ಪೂಜಿಸುವರು (ನೆನಪಿಸಿಕೊಳ್ಳಿ, ಮಕ್ಕಳನ್ನು ಪಡೆಯಲು, ಅದರಲ್ಲೂ ಗಂಡು ಮಕ್ಕಳನ್ನು ಪಡೆಯಲು, ಪೂಜಿಸುತ್ತಾರೆ) ಮತ್ತು ಧಾರ್ಮಿಕ ನಂಬಿಕೆಗಳ ಹೊರತಾಗಿ ಯಾವ ಸಾಮಾಜಿಕ ಕಾರಣಗಳು ಈ ಪೂಜೆಗೆ ಕಾರಣವಾಗಿದೆ (ವಿವಾಹಿತೆ ಮಹಿಳೆ ಮಕ್ಕಳನ್ನು, ಅದರಲ್ಲೂ ಗಂಡು ಶಿಶುವನ್ನು, ಹಡೆಯಲೇ ಬೇಕು) ಎಂಬುದನ್ನು ತಿಳಿಯುವ ಕುತೂಹಲ ಉಂಟಾಗುವುದು. ಹಳ್ಳಿಯ ಜನರ ಸಭೆ ಸೇರಿದಾಗ (ಗ್ರಾಮ ಪಂಚಾಯಿತಿ), ಯಾರು ಯಾರು ಕಟ್ಟೆಯ ಮೇಲೆ ಕುಳಿತುಕೊಳ್ಳುವರು ಮತ್ತೆ ಯಾರು ಯಾರು ನೆಲದ ಮೇಲೆ, ಕಟ್ಟೆಯ ಕೆಳಗೆ, ಕುಳಿತುಕೊಳ್ಳುವರು (ಪ್ರಾಬಲ್ಯತೆ ಅಧೀನತೆಯ ಸಂಬಂಧಗಳು) ಎಂಬುದನ್ನು ತಿಳಿಯುವುದು ಆಸಕ್ತಿದಾಯಕ. ಅದೇ ರೀತಿಯಲ್ಲಿ, ಈ ಜನರು ಯಾವ ಗುಂಪಿಗೆ ಸೇರಿದವರು (ಜಾತಿ, ವರ್ಗ, ಲಿಂಗ ಇತ್ಯಾದಿ) ಎಂಬುದನ್ನು ಗಮನಿಸಬಹುದು. ಅರಳಿ ಕಟ್ಟೆಯು ಅನೌಪಚಾರಿಕ ಭೇಟಿಗಳ ವೇದಿಕೆ ಕೂಡ. ಒಂದೇ ರೀತಿಯ ಜನರಷ್ಟೇ ಅಲ್ಲ ವಿವಿಧ ರೂಪದ ಗುಂಪುಗಳಿಗೆ ಸೇರಿದಂತಹ ಸದಸ್ಯರ ನಡುವಿನ ಅನೌಪಚಾರಿಕ ಸಂಬಂಧಗಳು, ಪ್ರಭಾವಗಳನ್ನು ನಾವು ಅವಲೋಕಿಸಬಹುದು; ಇಂತಹ ಅವಕಾಶಗಳು ಔಪಚಾರಿಕ ಸನ್ನಿವೇಶಗಳಲ್ಲಿ ಸದಾ ಲಭ್ಯವೆಂದು ಹೇಳಲಾಗುವುದಿಲ್ಲ. ಶಾಲೆಗಳೇ ಅರಳಿ ಕಟ್ಟೆಯ ಮೇಲೆ ನಡೆಯುತ್ತದೆಂದರೆ, ಸಮಾಜಶಾಸ್ತ್ರೀಯವಾಗಿ ನಾವೆಷ್ಟು ಕಲಿಯಬಹುದು ಊಹಿಸಿ.

ಸಾತ್ನದಲ್ಲಿ ಅರಳಿ ಕಟ್ಟೆಯ ಮೇಲೆ ನಡೆಯುತ್ತಿರುವ ಸರ್ಕಾರಿ ಶಾಲೆ

ಹಾಗಾದರೆ, ಈ ರೀತಿಯ ದೃಷ್ಟಿಕೋನವನ್ನು ಹೇಗೆ ಬೆಳೆಯಿಸಿಕೊಳ್ಳುವುದು? ಇದಕ್ಕೆ ಅನೇಕ ದಾರಿಗಳಿವೆ. ಮೇಲುನೋಟಕ್ಕೆ ಈ ದಾರಿಗಳು ತೀರಾ ವಿಭಿನ್ನವೆಂದು ಕಂಡುಬಂದರೂ ಕೂಡ ಅವು ಪರಸ್ಪರ ಹಂಚಿಕೊಂಡಿರುವಂತಹ ಅನೇಕ ವಿಷಯಗಳನ್ನು ಹೊಂದಿವೆ. ಪ್ರಮುಖವಾಗಿ ನಾವು ಸಮಾಜಶಾಸ್ತ್ರೀಯ ಕಲ್ಪನೆ ಮತ್ತು ಸಮಾಜಶಾಸ್ತ್ರೀಯ ದೃಷ್ಟಿಗಳೆಂಬ ಪರಿಕಲ್ಪನೆಗಳನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು.

#ಸಸಕತಕಸಕತ #sociology #pipaltree #ಸಮಜಶಸತರಯದಷಟ #peepaltree #ficusreligiosa #ಅರಳಮರ #ಅರಳಕಟಟ #Comte #sociologyinkannada